شيف ومدونة طعام مُلهمة وصانعة محتوى مُحترفة. تخرجت من مدرسة فنون الطهي في دبي. الشيف تمام tamamskitchen@ كتبت جريدة الخليج تايمز عنها, واستضافتها قناة تلفزيون أبوظبي، وما كانت صُدفة، استضافتها بسبب مهارتها وفنها في الطبخ. سألناها بعض الأسئلة عن شغفها و بدايته, خلّينا نتعرف عليها أكثر.
ما هي أولى ذكرياتك عن حُبك للطبخ؟
كنت أشوف أمي في المطبخ وهي تطبخ للعيلة ولأصحابنا، لذلك الطبخ يحسسني بالحنين لأنه يذكرني بذكريات الطفولة الجميلة. ما تتخيلين قد الفرحة والسعادة لما أمي كانت تسوي عزيمة لعماتي وخالاتي ونتجمع كلنا على الأكل.
متى شعرت بأنكِ تريدين أن تكوني طباخة؟
كان دايمًا عندي حلم إنى أكون طباخة! في الأول كان صعب أدرس في مدرسة فنون الطهي لأني متزوجة وزوجي كان يسافر من مكان لمكان. بس لما استقرينا في دبي استغليت الفرصة وتابعت حلمي وخلصت الدراسة في مدرسة فنون الطهي. لازم تعرفين إن الوقت ما فات حتى تسوين اللي تحبينه!
ما هو أكثر شيء تحبينه في عملك؟
بصراحة أجمل شي يفرحني هو تقديم الأكل للناس. الأكل شي يجمع العيلة ويسوي جو من البهجة. فكرة إنكِ تلهمين وتعلمين الناس وبالاخص المبتدئين كيف يطبخون أكل لذيذ شئ جميل ويسعدني. وأيضاً تفكيرك وتنفيذك لأفكار جديدة من خارج الصندوق شي رائع. تجربة المطاعم المختلفة وعشقي التعلم من طباخين موهوبين.
إيش أهم نصائح الطبخ اللي تعلمتيها من والدتك؟
أول وأهم نصيحة هي إني أحافظ على الأكل و إني أعيد إستخدام الباقي من الأكل أو المكونات . وإنه ممكن نسوي طبق جميل من الأكل المتبقي. والنصيحة الثانية هي أني أكون متأكدة من جودة المكونات اللي أستخدمها. وثالث شي إني أطبخ وأنا مزاجي رايق وحابة أطبخ أو راح ينعكس هذا على الأكل اللي أسويه.
لو كان عندك أمنية واحدة بس إيش بتكون؟
إني في يوم من الأيام يكون عندي مدرسة تعليم الطهي الخاصة فيني!
